مهما تعمل يا جحا

— نعم؟

قال الراجل وهو بيضحك:

— أنت راجل عجوز ماشي على رجليك في الحر ده، ومخلّي ابنك هو اللي راكب الحمار؟ مش عيب كده؟

وبص للولد.

بص جحا لنظرات الراجل لابنه، وبص لنفسه، وقال:

— عندك حق.

ركب جحا خلف ابنه، وكملوا طريقهم بيتكلموا مع بعض، ومش واخدين بالهم من مجموعة من الناس بيتكلموا من بعيد، ونظرات الغضب عليهم هما الاتنين.

وأول حاجة سمعها منهم:

— شوفوا الناس الظالمة دي!

استعجب جحا، وأول ما قرب منهم سألهم:

— في إيه؟

قال واحد منهم:

— فين رحمتكم بالحمار؟ راكبين أنتوا الاتنين على حمار واحد، مش خايفين عليه؟ ده يتكسر منكم!

سئم جحا من ظن الناس، فنزل بسرعة هو وابنه، وبصوا لبعض.

بعدين مسك الحمار من الحبل، ومشوا هما الاتنين جنبه ساكتين تمامًا.

مشي الابن شوية في صمت، وبعدين بص لأبوه:

— هو أحنا كده عملنا الصح؟

بص له جحا وقال:

— معرفش يا ابني... كل ما نعمل حاجة، حد يقول لنا بنعملها غلط.

ضحك ابنه وقال:

— طب نعمل إيه؟

جحا سكت شوية، وبص للحمار، وبعدين قال:

— شكلنا هنحتاج نسأل نفسنا الأول أحنا عايزين نعمل إيه، قبل ما نسأل الناس عايزيننا نعمل إيه.

"رضا الناس عمره ما يتاخد كله."

ده اللي فكر فيه جحا في اللحظة دي؛ إن مهما عمل، فيه ناس مش عاجبها، وبيفهموا فعله غلط.

قطع تفكيره صوت أخير، وهما خلاص قربوا من السوق:

— هو أنتوا ماشيين والحمار فاضي؟! أمال جايبينه معاكم ليه، زينة؟

بص جحا للراجل، وبص للناس، وأخيرًا بص لابنه وضحك، فضحك ابنه زيه.

وكمل جحا طريقه ناحية السوق، من غير ما يهتم مين بص له، ومين علّق، ومين فهمه غلط.